2025 er eit jubileumsår for barnehagen

I 2025 vert barnehagelærarutdanninga 90 år, barnehagelova 50 år, og vi skal feire 20 år med Barnehagedagen. Barnehagen har utvikla seg til å bli ein viktig samfunnsinstitusjon. Er det likevel behov for å markere slike hendingar? Mitt svar er ja! 

Barnehagesektoren har hatt det tøft over tid. Sektoren opplever bemanningskrise, vikarkrise, rekrutteringsutfordringar, skyhøgt sjukefråvær og låg pensjonsalder. Den nordiske barnehagetradisjonen, der leiken står i høgsetet, er under press, og vi ser ei aukande interesse frå eksterne partar som vil inn og definere kva barnehage skal vere, og korleis rammeplanen skal tolkast. 

Det er derfor viktigare enn på lenge at profesjonen sjølv markerer hendingar som rettar søkelyset mot oppgåva og mandatet til barnehagen.

Eit utstillingsvindauge

Barnehagedagen er ein slik arena. Barnehagedagen er mange stader ein etablert dag og dermed eit unikt utstillingsvindauge. Målet med Barnehagedagen er å synleggjere at barnehagen som pedagogisk institusjon kan spele ei viktig rolle i barns liv. Dagen gir dermed profesjonen ei gyllen moglegheit til å fremme barnehagen som ein viktig arbeidsplass. Vi som profesjon bør nytte denne moglegheita. 

Bruk Barnehagedagen

Det er ingen fasit på korleis ein kan bruke dagen, det viktigaste er at profesjonen tek han i bruk. Ein kan til dømes synleggjere kvifor leiken er viktig for barn si utvikling, kva barnehagelærarkompetanse kan tilføre, og kvifor det er behov for fleire nære kompetente tilsette. 

Set temaet på agendaen i personalgruppa, i lokallaget og i klubben. Korleis kan vi nytte dagen? Korleis kan vi fremme årets tema? Kan vi bruke dagen på andre måtar enn vi har gjort før? Moglegheitene er mange! 

Barnehagedagen 11. mars 2025 har det viktige slagordet «La leiken leve». Eg håpar alle barnehagar markerer dagen og startar planlegginga allereie no.

Dette innlegget har òg vore på trykk i Første Steg nr. 3/2024.