Internasjonal lærarorganisasjon vurderer framleis suspensjon av russisk lærarorganisasjon
Toppleiinga i den internasjonale lærarorganisasjonen, EI, har utsett å ta stilling til medlemskapen til den russiske lærarorganisasjonen.
Frå sekretariatet til Education International (EI) får Utdanningsnytt vite at grunnen til utsetjinga er at president, assisterande president og generalsekretær, som er arbeidsutval i organisasjonen, meiner dei treng meir informasjon for å ta stilling til spørsmålet. Det er særleg dei ukrainske lærarane sitt syn dei vil vite meir om. Nytt møte vil finne stad i løpet av februar.
Den russiske lærarorganisasjonen Eseur har støtta krigen i Ukraina. Eseur er medlem av Education International, der Utdanningsforbundet er sterkt involvert. 24. mai 2022 vektok EI at ekspertkomiteen skal vurdere suspensjon av Eseur, og at dette skal vere ei hastesak.
1. mars 2022 hadde Utdanningsnytt eit intervju med ein representant frå den
ukrainske lærarorganisasjonen Pon, som er medlem i Education International. Representanten
sat i eit bomberom og måtte av tryggingsomsyn vere anonym. Men oppfordringa til EI var klar: Ekskluder
den russiske lærarorganisasjonen Eseur.
Den ukrainske lærarorganisasjonen viste i mars i fjor til krava frå lærarorganisasjonane i Litauen, Latvia og Polen om at den russiske lærarorganisasjonen eseur blir ekskludert frå EI. 23. mars seier representantar frå Pon igjen til Utdanningsnytt at EI må ekskludere den russiske organisasjonen.
18. mai etterlyste spesialrådgivar Christer Holmlund i den finske lærarorganisasjonen «Undervisningssektorns Fackorganisasjon OAJ meir informasjon om dialogen mellom EI og Eseur. Holmlund er også generalsekretær i Nordiske Lærerorganisasjoners Samråd, der både Utdanningsforbundet og Skolenes Landsforbund er medlem. Medlemsorganisasjonane i Latvia, Litauen, Polen Tsjekkia, Slovakia og Finland har alle reist spørsmål om Eseurs medlemskap i EI etter at krigen braut ut.
