Bruk av nynorsk i fagbladet Utdanning – og om nynorsk som sidemål

Vi vil fyrst takke for eit interessant fagblad. Det bør likevel nemnast at det er ein låg prosentdel med nynorsk i bladet. Eit fagblad for lærarar burde i alle fall kunne greie å halde ein like stor del av stoffet på nynorsk som i NRK, som kjent 25 prosent.

I mange år hadde Utdanning leiarartiklane både på bokmål og nynorsk. Dette var eit viktig signal om at norsk skriftmål er både nynorsk og bokmål, slik Språkrådet, statens faglege organ i språkspørsmål, ofte minner om.

Språklova

I den nye språklova blir det òg understreka at nynorsk som minoritetsmål er under press og treng både vern og stimulering. Då verkar det underleg dersom ikkje ein gong eit organ for lærarane viser vilje til å gjere dette synleg med bruk av nynorsk.

Nynorsk (landsmål) har som kjent vore jamstilt med bokmål (riksmål) sidan 1885. I norsk skule har det vore viktig å ha opplæring både på nynorsk og bokmål fram til eksamen i den vidaregåande skulen. Ein god grunn for å ha sidemålsopplæring har mellom anna vore at alle i landet vårt skal vere i stand til å bruke både bokmål og nynorsk i offentlege stillingar.

Då lærarutdanninga kom inn i gode former i Noreg, var det stor rekruttering frå unge som var med å skape godvilje for nynorsk. Nynorsk var som kjent òg ein viktig del av nasjonsbygginga då landet vårt var i ferd med å få fullt sjølvstende.

Sidemålsundervisninga er i desse dagar under press. Då er det viktig at Utdanning skriv om dette og kjem med gode argument som fortel om den historiske og kulturelle bakgrunnen.

Mangelfull nynorskopplæring

Like eins er det viktig at Utdanning og Utdanningsforbundet tek opp problemet med mangelfull nynorskopplæring i lærarutdanninga. Vi ser at bladet konstaterer at det er slik, men her trengst det artiklar og spørsmål til ansvarlege styresmakter kvifor ein slik praksis kan halde fram. Det bør vere innlysande at dette fører til ei sviktande undervisning i nynorsk, noko som utan tvil er med på å minske god læring for elevane – og godvilje og prestisje både mellom foreldre/føresette og elevar, ja, vidare òg.

Det burde vel ikkje vere ei altfor stor utfordring å kunne skrive enkle oppslag og notisar på nynorsk i Utdanning. Og kvifor ikkje la Quiz-en ha nynorsktekst annankvar gong? Dersom redaksjonen i Utdanning ikkje kjenner seg trygg på å skrive nynorsk, bør det vere mogleg å få hjelp og rettleiing slik at bladet kan få til ein betre praksis. Lykke til med arbeidet!

Med helsing frå styret i Nissedal mållag

Margit Johansen, Harald Valle, Sigvald Oppebøen Hansen, Norunn Gaastjønn Tveit, Thor Oddvar Rekvik, John Olav Vaa, Irene Homme og Tor Valle (varamedlem)