Osloskulen sitt e-læringskurs mot vald får kritikk

Det skriv Dagsavisen.

Masterstudent Marie Bergli Fodstad, som sjølv har erfaring frå 15 år i Osloskulen, har undersøkt effekten av kurset og funne at mange lærarar opplever det som lite nyttig:

– E-læringskurset vart presentert som eit viktig tiltak for å møte valdelege elevar. Mine funn tyder dessverre på at det ikkje har hatt ønska effekt, seier Fodstad.

E-læringskurset vart innført av direktøren for Osloskulen som del av ein handlingsplan for å betre tryggleiken til lærarar i møte med vald og truslar frå elevar. Tiltaket kom etter at Arbeidstilsynet kritiserte Oslo kommune for ikkje å gjere nok for å sikre dei tilsette i skulane og truga med dagbøter dersom situasjonen ikkje vart betre.

Fodstad peiker på at kursa ikkje gav lærarane den tryggleiken dei treng i møte med utfordrande situasjonar. 

Berre ein av lærarane som deltok i undersøkinga, sa at dei følte seg tryggare etter kurset.

Forskar Børge Skåland, som har forska på vald mot lærarar, meiner funna viser ein mangel på praktisk støtte:

– Alt tyder på at dette ikkje er tilstrekkeleg for å auke lærarane sin kompetanse i å handtere eit svært utbreidd problem, seier Skåland.

Skåland er også uroa over at vald i skulen aukar, og meiner at lærarar er blant dei mest utsette yrkesgruppene.