– Vi kan ikkje stenge døra for motiverte folk som ønsker å bli lærarar

I år kom 716 studentar inn på lærarstudier utanom karakterkrava. Tidlegare kunnskapsminister Guri Melby er redd for at desse studentane kjem til droppe ut av utdanninga. 

Forskingsminister Oddmund Hoel trur ikkje det kjem til å skje. 

– Nei, det gjer eg ikkje. Vi har ikkje råd til å stenge døra for motiverte folk som ønsker å bli lærarar, slik Venstre vil. Vi har opna for å tenke nytt i ei tid der Noreg treng fleire lærarar. Derfor har vi teke dei nødvendige grepa for å få fleire inn i utdanningane og ut i skular i heile Noreg, seier forskings- og høgare utdanningsminister Oddmund Hoel (Sp). 

– Interessa blant søkarane har vore stor

Alle institusjonar med grunnskulelærarutdanningar unntatt NTNU har no søkt om dispensasjon frå nivåkrava for opptak til dei femårige lærarutdanningane. 

Han seier dette har vore ønskt velkommen av universitets- og høgskulesektoren og at dei kan ta imot fleire motiverte studentar neste år. 

– Universitet og høgskuler hadde ikkje søkt dispensasjon om dei ikkje meinte dei kunne lukkast med å utdanne fleire gode kandidatar.

Hoel seier også at regjeringa er godt i gang med å følge opp mål og tiltak i strategien for lærarrekruttering som dei har laga saman med 11 organisasjonar på utdanningsfeltet. 

– Det er lenge sidan så mange har forplikta seg til å gjere ein innsats for å rekruttere, utdanne og behalde lærarar. Til dømes styrker vi no rettleiing for nyutdanna lærarar. Vi har også teke grep for at fleire kan ta ei lærarutdanning uavhengig av kvar dei bur og kva livssituasjon dei er i, seier forskingsminister Oddmund Hoel.

– Vil disse studentene bli fulgt opp på noen annen måte enn andre studenter?

– Regjeringa krev forsterka oppfølging som ein del av dispensasjonsordninga. Eg er trygg på at utdanningane følger opp studentane på ein god måte, slik at dei lærer det dei treng.

– Vil de undersøke effektane av fritak frå karakterkrava?

– Kunnskapsdepartementet har gitt Nasjonalt prosjekt for lærerrekruttering ved Høgskulen på Vestlandet oppdrag om å evaluere dispensasjonsordninga løpande. Om ein lukkast med å utdanne gode lærarar som ikkje har innfridd nivåkrava, vil regjeringa vurdere å avvikle heile ordninga med særskilte karakterkrav.