Vil avskaffe avsluttande eksamen i Danmark

Det skriv folkeskolen.dk.

Dette er den nye tilrådinga til politikarane frå DLF, som foreslår å avskaffe avgangsprøver for alle elevar og i alle fag. DLF er Danmarks største lærarorganisasjon, slik Utdanningsforbundet er i Noreg.

– Både forsking og praktisk erfaring viser at avgangsprøver ikkje gjer undervisninga i skulen betre. Utan avgangsprøver kan vi fokusere på å lage god, variert og motiverande undervisning, seier Regitze Flannov, leiar for undervisningsutvalet i Danmarks Lærerforening.

– Vurdering

Det er allereie politisk semje om å redusere talet på eksamenar. I vår vart dei danske partia einige om å redusere talet på avgangsprøver frå åtte til seks frå komande skuleår.

Samtidig skal ei ekspertgruppe kome med forslag til korleis prøvene kan vidareutviklast og presset reduserast på lang sikt. Men lærarane går endå lenger og foreslår at alle prøvene blir avskaffa.

I staden for å avslutte grunnskulen med eksamenar, meiner DLF at elevane skal få ei avsluttande vurdering av sitt faglege nivå, utført av lærarane sine.

– Det vil gi eit heilskapleg blikk på elevens faglege nivå som dei kan ta med seg ut av skulen, og det skal ikkje avhenge av ein 20 minutters prestasjon på ei avgangsprøve, seier Regitze Flannov.

Ser ein til dei andre nordiske landa, er det berre Noreg som, i likskap med Danmark, avsluttar grunnskulen med eksamenar. I Sverige, Finland og Island blir grunnskulen avslutta utan ei avgangseksamen.

Fjerne  ordet «eksamen»

Den danske Skolelederforeningen er positive til initiativet.

Leiar Claus Hjortdal seier at spørsmålet er om det er realistisk å få gjennomført.

– Dette er ikkje nødvendigvis det politikarane vil, seier han.

Skolelederforeningen foreslår at ein i staden reduserer avgangsprøvene til berre dansk og matematikk.

Fleire skuleleiarar ønskjer dessutan å fjerne ordet «eksamen» fordi det kan skape unødig press for elevane.

– Grunnskulen skal ein ikkje bestå. Ein skal gjennomføre den. Vi protesterte kraftig då det blei innført at ein skulle bestå, men det blei nesten ubemerka vedteke, seier Claus Hjortdal.